By: Dr Joseph Suantak, Tuibuang Bazar, Churachandpur.
Simtu dingte kiangah thumasa: Zia article min hin hun su kizawk mai thei. I leisiat khangthu, sim leh zilna, sep leh bawl, nek leh chak hawlna, leh sakhuana ah a kabawm leh bak chuamchuam kuakuan i buaipi vitvet lumlet vel kal ua kei a mimaw pen buaina __ ‘Jesu Khrista leh ama gingtute’ khangthu mawl bilbel ah kala suidaw dan thu chawmcha mai a hi’i. Thagau leh taksa ah bangma hilou penin kamchang lemtuak thiamlou tak mai ah ka hun zikpawl bialbual hih; kuama khenchuam leh kawksak chuam ahilouleh, gensiatna lam ei puai ti hih lungdam takah lei la pawmpiak ngei uh kinemin ka hun ngek masa a hi.
Thupuak: Ei uh Indo-Bangla-Myanmar border ah gam liantak luate hi ‘indigenous’ [a leichang chate] leh i hung kuandawna uh thakhat a hi’i, ti hih tuni tiangin i nial ngai puau. Nial chi le ei puai. Ziachuleh, Pathian chapa ‘Jesu Khrista’ kitipa khan tumthing khraws ah a hinna chan hialah eila tatdaw i hiu ti tawh. Kum 1890-AD nung deucha kipat a khan a ban ban’in Christian sakhuana hih i hun pawmun, i hun lalut pan ua. Ziachule British ten i kimvelah mi namdangte tawh kithua ah thagum ah ei hun nuai ua ei hun chutkhum ziakuh hi nalai set! Tichun, lekhamal neilo mawl mialmual ah ala khawsa sekte khan lekhamal te i hun nei khawlaw tau va; ziakthei-simthei mihiam’in i hung kisek tou zel ua. Taksa bep hitaloin, sakhuana lamin le i hung ki unau tou dialdial zel ua. Christian kochuam/pawl leh biakinn tamtak i hun hingdawk tau va, ki at a um mamai. Tukum 2010 diakdiak hih ‘Gospel Centenary’ buai’in i buai vetvut tawl ua; i kikhen zak lo bep un ka hia. Kum tawp lam tiangah le zia ‘centenary’ hih lawp gua zawmzel um hileu hin a kilawm nalai a. Kipakpi leh ki atpi i um mama zel ui.
Awle, hiti gualah taksa leh sakhuana lamah khantouna nasa tak gensenlo i nei nunguh hinle kuama’n Jesu Khrista khan phikpi suapi dang a nei leh neilo hih limsak inle i nei kha puau va. Bible inle kichian takah eila genlo ziak hou a diam? Secular lamah research scholars, leh theologylamah research scholars i nei teu hinle ei gen lamuh ka he kha nai pua! Alebah, i sui pei bekset puava a diam aw? Ahilouleh, regular takah thawlawm taphawt thaw leh biakin kikhawp; chun, ‘Khristian’ ti min i ki bul ua hih lungawi ziang khattou i hiu em? Aziakchuh, keile mi lungthim tamlo ka hi ziakin, zia chungchang hih va ha kan leh va ha suithuk takluat hih kala pei ngai pua. Ahin, tuhun tiangah i dinmun teu vak et ah puaknatna liantak ka sungah hung kisekdawk hin zia thupi hi ei hun suisak ta.
Tulai ah i cha leh naute’u haw hin hepha khel tapuan tin uh; tanglakcha ka hilai a khan ‘Light House Cinema Hall’ tawh ‘Churachandpur Cinema Hall’, a khente’n ‘Kampu sinimahawl’ – ‘Sasang sinimahawl’ ila ti sekua. Zia sinimahawl teni a hin a vanglakcha’h Amitabh Bachandouble role hina flim a hung suak poupou leh ticket a full deu vek sek a, a lamdang talaw puai. Keile Amitabh Bachan double role ngawlpi lawi lakah member khat kala hi keuhkauh sek euh-auh e. Khatpa chu miphalo, a khatzawk chuh mipha mama a hi deu pen sekua. A phalo zawkpa chun gitlona tincheng phial a bawl deupen sek a. Ahin, a chaina lamin capital punishment a chang deu veu sek ngen hi. Flim khenkhat a chun kipak takin a phalo pa chunle, a gitlou buak zousia nusia’n, a phapa chutawk kituak takin a ‘the end’ thei sek tho ui. Zia gual a hin, tulai ah ei taksa leh sakhuana ah kikhen theilo dingte hinapi’n, bang leh bang hih i situa sekua i mawllai-neulai gualmai ah nuting-pating tele hiti-khuti ziang sek ita’u em le? Pathian Biakin tawh eima chenna inn leh lou, loupi leh liantak-tak i tungdawk ua; i khawmu uleh i lungthim ulah neupilik cha-cha. Ka lunggel a chun, tulai ah i Jesu Khrista zuipen uh hih a phikpipa, a phalo zawkpa khattou kha a hia a hi diam aw? tite keile kei ka kidawng lungkham sek a.
JESU A PHA ZAWK: Jesu a phazawkpa chu Thing Khrawsi lekah ki khaikangpa kha a hia. Pathian Tempul sung le hilou, a maitual ahgambling leh dukan bawlte maimai bawn a tawpek tawh kungfu khum tawh thua ah nawzawk hial hileh a kilawm a. Ei lawi, mi nek ding zousia kiphalam lo hialah negu ekek ah Kochuam thawlawm tampipi tawh Pathian Tempul loupi taktak tungdawk ngamte hih ei khenlum hial lou ding a hem maw? Sun leh zanah ka pauchap a, Biakin kikhawp leh khawmpi zousian lah ka pang a. Kouchuam thawlawm kiti phawt lah ka thaw a; Kouchuam sungah dinmun poimaw zousia kei a, a felpen, tawmngai pen leh mi muan pen lah ka hingal ah. Bang ati leh ka insung hih hiti ziang? Iki hedawk nuam puava himailo mawh? Icha-inau-ivawn-isawn hung seilian zel dingte ngaitua leh lainatna thempilikcha bek nei’in chunglam office a khin petition thak liklek; Jesu Khrista diktak chuh ilak ua hung chengdet dingin, a formula leh a grammar diktak mangcha’n hang selut kin gaw bek taleu hinla, maw? A phikpipa nung hivang zui da tai tiu ve khai! Chim a um talaw bekset tai.
