S.K.Hansing (skhansing2004@yahoo.com, hansing@rediffmail.com)
Thumapui:
Zillai, Shillong Block te chialna tawh kitawn in Zillai Day, 31-05-2011 a khan “Importance of Literature in our society” ti thupi mang in Seminar nei ala hi. Zia seminar na ki gen khenkhat tawh, belap hun khawp hung gawmkhawm in zia article hung ki ziak a hi.
“Literature” Definition: Lit-era (Latin word)- (letter), Lit-era-ture-Literature kiti thumal hung pawt ahi a tiu hi. Zia “Literature” in a huap hi- (a) Zik thaw, Ziaklut (b) Pau ziak dan, lekha zik leh sim dan, Aw phawi dan, pau mat dan, genchet dan, lungput, chawndan su langtu ti ahi.
Vaiphei pau hung kipatna:
Lusai-Duhlian pau thaw. Sino-Tibetan kampau lak ah pat awl awl ah hung piang dawk in a ki gen hi. Vaiphei pau ki ti lak hin le Sizang pau (Teizang), Phailengjang pau(Ngun-gal)-Meitei-Thadou aw-phawi, Thangkhal pau- Teddim-Zou awphawi bang le a mang zing nalai pawl le a ki um tho hi.
Vaiphei Lekhamal hung kipat na:
# Lushai Hills 1894-95- Bu Bul-English Missionary SW Savidge leh James Herbert Lorrain (Pu Buanga ti ah ko ah um pa kha)- a mau pawl hin unau Lushai te lak ah Pathian thu a mau pau ngei ah gen nawp nalam in Lushai pau a hung zil ua, kum sawt khawp nung in Lushai Alphabet a hung siam piak ui. Ziabep chule hilo in Dictionary: English-Mizo, Mizo-English tiang bang le a hung bawldawk piak ui.
# Kristian Tlang-au 1911 hi Lushai pau ah Pathian thu lekhabu kibawl dawk masa pen ah hiat a hi.
# Lushai Hills (Mizoram) ah Bible zil, Pu Lungpau leh Pu Thangkai, Pu Manghen te malat na’n leh Pu Watkin Roberts tilkho na ziak in Lekhabul / Lekhamal (Alphabet) 24+1 te - 1910-12 (Roman lekhamal) Vaiphei pau mang te a ding in a hung siam dawk tau hi.
# Vaiphei pau ah simthei Lekha bu ki sun/bawl masa pen: Naupang Thu ki sang leh la kithua (1913)
# Chanchin pha Johan Ziak (1917) # Simpat Bu (1923) adg dg.
Literature poimawna:
*Literature is the yardstick by which the progress of a society is measured. *A society is judged by its literature and its language, which is its identity. *Words and languages are building blocks of Literature.
- Literature hin bang tiang lawm ah i hinna sukha a h’em?-Hiatna belaptu, lungput su jautu,simthei, ziak thei, ngaitua thei, he khen thei, hinkhua kawkmu tu (guiding principle, value addition) ti a hi.
- Literature ah hausa leh ki ningtingte: Greek, Latin, Hebrai, Sanskrit, Indian Epics-Ramayana, Mahabharat, English leh English Literature bang hin khawvel a zaw dan te vak gel ziang ah le Literature in tha anei dan hiat ziang thei a hi. French Revolution hung kipat dan leh a gasuate bang. Bible lekhamal leh ziakthaw, chuleh lekhabu a hung kisiam dan te bang i sim leh mite hin lekha a dawi takzet ui ti a mu thei hi.
- Gam changkang dangte: Russia, China, Japan- Tel suina leh scientific min haw bang a mau pau ah nei vek uh ti haw hi en um ma ma namte a hiu’.
- Zo suante lak ah khangto jaw diak te - Lushai 1894-95 vel ah Lekhamal (Alphabet) a hung nei pan ua, Vaiphei in le 1913 in simthei ah lekhabu a hung nei ta’i. A kikal kum 20 vel bep kikhia ahina chuh tu dinmun i et leh a ki kak tiat tiat a bang hi. Paite leh Teddim-Chin te pau kinai na ten a um ah, zia ziak ma ah hile kizawp deu ahi ding ua aw ti thei a hi. A chang-kang, a khangto deu i tite hi Literature a limsak jaw deu haw ma hi’n au ti lung-gel khat ei pia’i.
- A gasua dan (Result)- Ziak leh sim, la leh thu dawina leh hiatna lam ngaisan ziak ah hindan thujaw ma ma thei a hi a kilang thei hi. Literature hin hiatna-pilna belap, geldan-suidan, ngaitua dan, doi dante hung su gual thei a hi tithei a hi. Suangtuanate, thungakna te, thu khenna te phungvuktu a hi ti a hi, Masang lai ah Greek philosopherte lungput-thugel leh kampau te bang etsakna hawi a hi.
= Mi changkang/khangliante chu lekha sim tamte, lekha sim tamte chu hiatna haute, hiatna haute chu masawnte, khangto te a hi ui ki ti leh ki zuau pua’n ah. Zia kipat hung kilang chu- Zik tam i nawp leh simtam, ngaithak tam, hiat tam ngai ma ma dan a la hii.
Literature chite (Types)
(1) Ziakthaw (written)-Thusim, Thuziak, La-vui, Chanchin, Chawndan adg dg.
(2) Kam ah (Oral)- Tuanthu, Tawt (ets-Tualte vanglai), Nau-awi la, la leng-lawng adg dg.
A dan (Technique)- Then lumlet, a khawn, Tawt-Nuina, Lim, eng-pauna, hem-gen, mi khat suaksakna, A kihel dan: (elements) Plot : Toi dan, kilat dan-mai-sua, lemthaw dan, suklat dan, thupi, aw-git dan, ki bul dan. Tite haw. English ah - Plot: Acts/Scenes, character, setting, theme, structure, language.
Etkikna leh Tulai dinmun:
(A) Vaiphei sung ah Lekha lam doina- Lekha zik lam-(Bibliography). Thildang tampi le um kha’n ti’n, Vaiphei sung ah pau a hung ki the-jakna thu a hin vak en le_kum 1913 ah pat Naupang Thu ki sang leh la kithua (1913)#Chanchin pha Johan Ziak (1917)# Simpat Bu (1923).#Vaiphei Labu (1923)#Vaiphei Zillai kum 1939 #Vaiphei Dramatic Union, Primary Circus- kum 1958 #Vaiphei Bible sukdaw -NT, NT&Psaims-1957, 1983-84 #English - Vaiphei Dictionary 1988-89, adg dg. #Vaiphei Literature Society Regd. 1999, chuleh skul subject pawl 10,11 leh 12 tiang in a chawi uh. Ziahaw chuleh lekhabu mi chuam chuam in a la siam uh haw hin tha a la nei ma ma uh a la hidan a hi.
(B) Vaiphei Grammar thu: Tulai hin i pau uh hi i chokpol vek ua, pau dan, aw phawi dan hi dikvek, diklo vek, eima dawidan chiat in i mang un i ziak ua, kuama le a ki awi-maw thei le um lo hileh kilawm in a lang hi.
(1) Pau malgawm zia (orthography)-pau lakkhawm, Mopheme-Pau-mal lep thak thak ding a pawimaw hileh a kilawm hi.
(2) Aw (Tone)- Sino-Tibetan kampau leh aw phawi –Tonal Language- Aw sang, aw-niam,-Sum-money,Sum-busukna,Sum-mist. Aw-tak, aw-nem,-Lei-tongue,Lei-earth,Lei-bridge - Aw phawi dan-(phonetics)-Thum-three, Thum-sweet, Thum-Khing, Thum-Na sa thum tite haw i nei lemlum ui.
(3) Aw pheisau (long vowel)-Zu kham khamte khawsung lamkai ding ah phalo. Kham-tampi dawn ah kham, Kham-phallo tina le hithei. Double Vowel matna ding a tam talua, Zomi printing press ah lekhabu siam na ding a chun -Vaiphei-aa, Simte leh Paite –hh a tam talua, khawl-ha ki dai zo ma ma seklo in, khawlha zen in press Manager Phaipi lam a tung thi-the hi a tiu leh taksan le um thim.
(4) Pau kimang tangpi te- Dak-pung,Ni-Tarik/date, Abul-foundation, Ziaklut-record, envelop,pen, contact, top-up, recharge, balance-Milip in ki mang ta, Vaiphei pau ah laklut sik sek pha’n ah.
(5) Pau dik leh diklo thu ah – pua hi-puai, a hi-ai, ei, A hi em-ahem, ta em-tam, ka hi-kei tite ki mang suk.
(6) Ziakdan dik leh diklo thu ah-a kim a kiang (context) en kawm kawm ah a khiakna tawh sim, chutia a gennop pen hiat thei ti bang le um, hiat haksa le um jel. ‘A’thu ah-Personal Pronoun, ‘Ah , In’-Auxiliary Verb matna bang a tam ma ma’i. ‘O’ leh ‘Aw’ thu ah, ‘J leh Z’ thu ah gen ding le tam ma ma.
Vaiphei pau hawina te:
Mun khat ah umkhawmna chun tangval pani (2) Vaiphei pau ah thiam tak ah holim ka tuak kha, a Vaiphei malak, a mau pani a kiho phat un Meitei a hi lam uh ka he bep hi! Vaiphei pau hi Chamna thugenna, Mo dotna ding in a pha’i ti ahi. Thumal lawdaw-adv. tam (emphatic adv) Ets--Dum dii-diai, hing dip dep, khetha vel vel. Gen uarna: Ak-ek kuchik, thaam helhul,thim bikbek, ui-thilit, val sitset, nezo sik sek, nuai chimit-a ki ningting hilo maw? Tuanthu-Liandote unau, Suiting & Ngambawm, Unau changmai tute thute hawle Vaiphei pau ah ki sut thei. “Vaipheite a ding in Vaiphei pau ma a hawipen e”.
Sukphat ding dan guanggalna leh pan lak ding dan: Nidang lai te, vak ti le’n, tu-ah i nam sung ah a damlai upa lam deu haw Class VI chan vel Vaiphei pau ala sim vek tangpi a hiu. Ziaziak ma chuh a hidiam, kam-pau, thumal zik lam a hin a kitel ma mau’. Tulai kiti deu te hin A AW B CH sim talo in School i hung kai thei a pat ABC in i hung pan ah, a khawvel khanto dungzui in English lam ma ma i habawl tau’. Tichun, Vaiphei pau sim theilo, sim thiamlo, zik thiam lo a tamjaw bang le ki hi ta mai thei a hi. Ngaikhawkna, Pau/thumal belap,Lekha zik, Lekha bu bawl, La phuak, Cassette/Album bawl, News lak/sim ti leh i pau ah ki siam him him chaw in, sim in neichiat thei le hin chu a bawltute le lawk tak tak ki leu’ le, thatnawp um deu in ti’n, beplo,i pau ngaikhawk in, midang a sang in ngaisang jawle hin chu tu sang sang in i dinmun a hawi jaw dia aw ti ngaidan ei piai.Website-Khawvaiphei.net ve kisiak leh comment piak bang le bawl chi khat. I pau chei-mawi lam pang hakat le hing mi hib jaw ding in taksan a um hi.
Ngaitua leh etthak ding te:
- Puaphat a ngai em? Sim tam, ziak tam, phuak tam, mang tam phawt phawt le a hawi dia?
- Literature suk pitin diak na ding kua mawpuak a h’em?
- Suk let/ huap let na ding in bangte hih a pawimaw em?-(i) A AW B CH limsak ngai (ii)Vernacular ngaisan ngai-phatchuam ngaina-awlmaw (iii)Sim pei, ziak thei/thiam ngai (iv)Chawk ngai (v)Hun piak ngai – tite haw a hi kha dia’m?
- Short-term/Long-term objective nei a pha diam? Bang gual in?
- Ki pumkhatna leh ki unauna sukdet a hi diak na ding in Pau leh ziakdan hin poimawna a nei em?
- Vaiphei Holy Bible sim chiat phot le ho pau lam a hin a dik-a jawn, i kigual deu dia’m?
Thuchaina:
(1) English bang gual in zil in, thiam le hin le English ki hithei diak pua’i ti’n, Vaiphei ma ki hi zing tho in ah.
(2)Vaiphei Dictionary su lian/su jau hi tiu.
(3) Kum 2010 khan Gospel Centenary i la lawm tau ah, 2013 hi Literary Centenary lawpna’n mang ding in ki singsa/pan la hi tiu.
A sim kisin tiam in: Kang-kap khua’n khawkhal lai chun kang a kap kap sek ui. Khawkhal lai in tui a kang sek hi. Tui kang lai in tui kang ngak pawl le a um ui. Hitihun a hin gam a kang kang nuam hi. Kang ki kap nuam in naupang haw a kap kap sek ui. Kang kap haw chun Kang haw chu kang vom le, kang kang le a mang ui. Kang kang hi thingkang nai a kang a nu ua kang kang a siam uh a hi. Kang kap te chun kang kang hi a doi diak uh a bang hi. Aziak chu kang kang te a gikdeu ziak uh a hi. Kang kang neilo te a ki kang kawi deu sek ui. Kang mu le nekthei a hi a tiu ah a kang kang sek ui a tiu. Kang mu kang dingte chun thing kang po tik in a kang sek ui. Kang ki kap kap pawl tawh, kang mu kang kang pawl tawh, a kap kap pawl tawh a buai veng-vung sek ui. (Zik dan, sim dan leh khentel a ngaina etsakna mai a hi)
Vaiphei Lekhamalte (Alphabet) ziak in:
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
VAIPHEI PAU IN LET IN: PAU GIL (Pau uhpa) Bang genna a he’m?
Committee -
Fiction -
Creative -
Technical -
Meeting -
ENGLISH IN LET IN :
Ki siak (nasep) -
Hawmthaw -
Saino -
Nel (ngamthaw) -
Vaisamphawng -
= = = = = = = = = = = = = = = = = = = = = = = = = = = = = = = = = = = = = = = = = = = = = = = = = =
Nisin Thuhiltu Press Release: Kiginni 01-06-2013
Vaiphei Literary Centenary lawpna: A mun: Vaiphei Community Hall, Bethel Veng, Lamka. A ni: (Simhaini) May 31, 2013 #Zillai Day hi tawh kitawn in Vaiphei Literature kum 100 tinna VLCC (Vaiphei Literary Centenary Committee) te malatna’n VLS lawiupate, Zillai Hq, Officers’ Forumte leh Vaiphei Research Forumte panlakna leh lamkaina lopi tak leh lawting tak ah matzaw a hi ta’i. Pawlpi a chiakhawmte –Kochuam lawi-upate, VPC, VLS, Zillai Block tin ah ai-awtute, YVA, Khawvaiphei.net Admn. Board, VAA , Zahawnggroup chuleh Writers’ Club memberte leh MP pu, MLA 3 leh MDC member zosia chuleh mipi chiakhawm kigawm in 3100 vel ah tuat a hi.
Zia nikhua thil ki bawl taklat kham khenkhat te chu:
- “Naupang Thu kisang leh la kithua” (1913) siamdawktute jana piak a hi.
- Literary Centenary Souvenir 2013 hawndawna le nei ngal a hi.
- Vaiphei-English Dictionary siamdaw ding ki thugualna nei a hi.
- VAA te malatna’n La thak (Pathian la, Gam-ngai la, Jawl la) 125 lakkhawm a hi.
- VAAte malatna ma in Special Album 2 hawndawna le nei a hi.
- Vaiphei pau ah lekhabu thak 7 hawndawna nei a hi bawk hi.
- Vaiphei pau ah thugen thiam pen 3 te kipakman piak a hi.
- Vaiphei pau ah lekhabu ki siam dawk sia 365 ahi ta’i ti puandawna nei a hi.
- Vaiphei Text-book for Class BA/TDC hawndawna le nei a hi.
- Khawvaiphei Film Company te a pat Film khat hawndawna le nei a hi.
__________________________________________________________
